28 May – Azərbaycan Xalqının Qürur Günü. 

1918-ci il mayın 28-də Azərbaycan xalqının tarixində ən şərəfli səhifələrdən biri yazıldı. Həmin gün Azərbaycan Xalq Cümhuriyyəti yaradıldı və İstiqlal Bəyannaməsi qəbul edilərək ölkəmizin müstəqilliyi bütün dünyaya elan olundu. Bununla da Azərbaycan Şərqdə ilk demokratik parlamentli respublika kimi tarixə düşdü.
Azərbaycan Xalq Cümhuriyyəti qısa müddət fəaliyyət göstərməsinə baxmayaraq, dövlətçilik tariximizdə mühüm iz buraxdı. Milli ordu yaradıldı, dövlət atributları qəbul edildi, təhsil və mədəniyyət sahəsində mühüm addımlar atıldı. Üçrəngli bayrağımız ilk dəfə məhz həmin dövrdə xalqımızın milli rəmzinə çevrildi.
1991-ci ildə Azərbaycan yenidən öz dövlət müstəqilliyini bərpa edərkən xalqımız qədim dövlətçilik ənənələrinə sadiqliyini nümayiş etdirdi. Müasir Azərbaycan Respublikası Azərbaycan Xalq Cümhuriyyətinin siyasi və mənəvi varisi olduğunu təsdiqlədi. Dövlət bayrağı, gerbi və himni yenidən qəbul edildi.
2018-ci ildə Azərbaycan Xalq Cümhuriyyətinin yaradılmasının 100 illik yubileyi ölkəmizdə geniş şəkildə qeyd olundu. Azərbaycan Respublikasının Prezidenti İlham Əliyev tərəfindən 2018-ci ilin “Azərbaycan Xalq Cümhuriyyəti İli” elan edilməsi haqqında sərəncam imzalandı. Respublikamızın hər yerində keçirilən tədbirlər xalqımızın dövlətçilik tarixinə olan böyük hörmətinin göstəricisi oldu.
Milli Məclisin 2021-ci il 15 oktyabr tarixli plenar iclasında “Müstəqillik Günü haqqında” yeni qanun qəbul edildi və 28 May tarixi rəsmən Müstəqillik Günü elan olundu.
Bu gün 28 May yalnız tarixi bir gün deyil, həm də xalqımızın azadlıq iradəsinin, milli birlik və dövlətçilik ənənələrinin rəmzidir. Azərbaycan xalqı daim öz müstəqilliyini qorumağa, dövlətini daha da gücləndirməyə və gələcək nəsillərə güclü Azərbaycan mirası ötürməyə davam edəcəkdir.
Yaşasın müstəqil Azərbaycan!

Anar Nağıyev, hüquqşünas-jurnalist