Cənubi Qafqazın lider dövləti kimi çıxış edən Azərbaycan öz çoxşaxəli və balanslaşdırılmış xarici siyasət kursu ilə beynəlxalq miqyaslı əməkdaşlıq və təhlükəsizlik məsələlərinə xüsusi diqqət yetirir. Regionda sabitləşdirici aktor kimi  çıxış edən ölkəmiz xarici siyasətdə milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürür, beynəlxalq münasibətlər sisteminə yeni və daha mütərəqqi dəyərlər təqdim edir. Bu xüsusda Azərbaycanın xarici siyasət kursunda Gürcüstan ilə qarşılıqlı faydalı və bərabərhüquqlu münasibətlər böyük əhəmiyyət daşıyır.

Təbii ki, bu  ilk növbədə bütövlükdə regionun tərəqqisi, həmçinin bölgədə sülhün və təhlükəsiliyin təmin olunması baxımından mühüm önəm daşıyır. Öz növbəsində, Gürcüstan da  Azərbaycanla çoxşaxəli əməkdaşlığı öz milli maraqlarına müvafiq hesab edir və tərəfdaşlığın genişləndirilməsi niyyətində olduğunu bildirir. Bütün bu məqamlar ötən günlərdə Gürcüstanın baş naziri İrakli Kobaxidzenin ölkəsində keçirilən Parlament seçkilərindən sonraki ilk səfərini Azərbaycana etməsində, keçirilən görüşlərdə səslənən bəyanatlarda bir daha öz əksini tapdı.

Təsadüfi deyil ki,  Gürcüstanın  baş nazirinin  yanvar 17-də ölkəmizə səfəri çərçivəsində  keçirilən görüş zamanı canab Prezident mətubuata bəyanatla etdiyi çıxışında bu səfərin qonşu ölkədə keçirilmiş, parlament seçkilərindən sonra ilk xarici səfər olduğunu xüsusi qeyd etdi. Gürcüstanın baş naziri İrakli Kobaxidze də iki ölkə arasında əlaqələrin səviyyəsini yüksək qiymətləndirərək, ölkələrimiz arasında mislisiz dostluq əlaqələri və sıx münasibətlər olduğunu, həmin münasibətlərin  tarixi əlaqələrimizə və qarşılıqlı hörmətə əsaslandığını, müasir dövrdə isə həyata keçirilən qlobal layihələrin iki ölkənin siyasi çəkisini dünya miqyasında daha da artırmaqda olduğunu vurğuladı. Digər tərəfdən cənab Prezidentin qeyd etdiyi kimi bu səfər, Gürcüstan-Azərbaycan münasibətlərini yüksək səviyyədə olduğunu göstərməklə yanaşı, eyni zamanda hər iki ölkənin bir-birinə verdiyi dəyəri nümayiş etdirir. 

  Azərbaycan və Gürcüstan əsrlər boyu dostluq, mehriban qonşuluq və qardaşlıq şəraitində yaşamış ölkələrdir. Bu gün də bu əlaqələr geniş müstəvidə davam edir. İki ölkə arasında siyasi, iqtisadi, enerji, nəqliyyat-logistika və mədəni sahələrdə qurulan əməkdaşlıq regional və beynəlxalq səviyyədə ciddi əhəmiyyətə malikdir. Azərbaycan-Gürcüstan iqtisadiyyatına 3,6 milyard dollar sərmayə qoyub ki, bu da qonşu ölkədə yaradılan müsbət sərmayə mühitinin və hər iki tərəfin qarşılıqlı maraqlarının əksidir.    Azərbaycan investorlarının  Gürcüstanda aktiv fəaliyyəti, iqtisadi sahədə əlaqələrin daha da dərinləşməsinə təkan verir.

Azərbaycan və Gürcüstan eyni zamanda enerji sektorunda da strateji tərəfdaşdır. Bakı-Tbilisi-Ceyhan və Cənub Qaz Dəhlizi kimi layihələr Avropanın enerji təhlükəsizliyinə xidmət edir. Gürcüstan Azərbaycan qazının tranzitində mühüm rol oynayır. Belə ki, hazırda Azərbaycan Gürcüstan tranziti vasitəsilə öz qazını 11 ölkəyə ixrac edir. Gürcüstanda istehlak edilən  qazın 80 faizdən çoxu Azərbaycanın payına  düşür.

Azərbaycan və Gürcüstan arasında nəqliyyat-logistika sahəsində əməkdaşlıq da xüsusi önəm daşıyır. Orta Dəhliz – Avropanı Asiya ilə birləşdirən mühüm nəqliyyat dəhlizi – həm Azərbaycan, həm də Gürcüstan üçün strateji əhəmiyyətə malikdir. Bu layihə təkcə iki qonşu ölkənin iqtisadi potensialını artırmaqla qalmır, eyni zamanda regionun beynəlxalq nəqliyyat və logistika mərkəzinə çevirlməsinə zəmin yaradır.

Azərbaycan və Gürcüstan uzun illərdir ki, bir sıra beynəlxalq layihələrdə uğurla əməkdaşlıq edirlər. Bakı-Tbilisi-Ceyhan neft kəməri, Bakı-Tibilis-Qars Dəmir yolu və digər layihələr bu əməkdaşlığın bariz nümunəsidir. Orta Dəhliz də  bu uğurlu əməkdaşlıq tarixinə yeni bir səhifə əlavə edir. Bu dəhliz Azərbaycan və Gürcüstanın infrastruktur imkanlarını inkişaf etdirməklə yanaşı, iqtisadi inteqrasiyanı dərinləşdirir və regionun qlobal ticarətdəki rolunu artırır.

Prezident İlham Əliyevin bəyanatında vurğulandığı kimi  bütün bu əməkdaşlıq perspektivləri hər iki ölkənin xalqlarına və regionun inkişafına xidmət edən strateji hədəfləri əks etdirir. Bu baxımdan şübhəsiz ki, keçirilən bu görüş yalnız ikitərəfli əlaqələrin inkişafına deyil, həm də regionda sabitliyin və iqtisadi inteqrasiyanın gücləndirilməsinə mühüm töhfələr verəcək, Azərbaycan-Gürcüstan tərəfdaşlığının davamlı inkişafına və daha parlaq gələcəyinə doğru atılmış növbəti addım olacaqdır.