Şəmkir rayonunda Xocalı soyqırımının 30-cu ildönümünə həsr edilən tədbir keçirilib.

Rayon icra hakimiyyətindən verilən məlumata görə, rayon icra hakimiyyətinin başçısı Rəşad Tağıyev, hüquq-mühafizə orqanlarının, idarə, müəssisə və təşkilatların rəhbərləri, rayonun fəal gəncləri əvvəlcə Şəmkir şəhərində Soyqırımı abidəsini və Şəhidlər abidəsini ziyarət edib, önünə tər çiçəklər düzüblər.

Sonra Şəmkir Gənclər Evində tədbir davam etdirilib.

Çıxış edən Şəmkir RİH başçısı Rəşad Tağıyev bildirib ki, 30 il əvvəl - 1992-ci il fevralın 25-dən 26-na keçən gecə erməni silahlı qüvvələri mühasirəyə aldıqları Xocalı şəhərində 613 nəfər, o cümlədən 106 qadını, 63 uşağı, 70 qocanı öldürüb, 487 dinc sakini ağır yaralayıb, 1275 nəfəri girov götürüblər.

Ulu öndər Heydər Əliyevin xalqın istəyi ilə hakimiyyətə qayıdışından sonra bu faciəyə hüquqi-siyasi qiymət verilib: “Xocalı faciəsi təsadüfi hadisə deyil. Xocalı faciəsini törətməklə ermənilər xalqımızı qorxutmaq, mübarizə əzmini qırmaq, tarixi torpaqlarımızın bir qisminin itirilməsi ilə barışmağa məcbur etmək istəyirdilər. Bu gün Xocalı faciəsinin dünyada tanıdılması Azərbaycanın xarici siyasətinin əsas istiqamətlərindən birinə çevrilib. Prezident İlham Əliyevin uğurlu xarici siyasəti nəticəsində artıq bir sıra beynəlxalq təşkilatların qəbul etdikləri sənədlərdə Ermənistan işğalçı dövlət kimi göstərilib və Xocalı faciəsinə hüquqi-siyasi qiymət verilib”.

Tədbirdə Xocalı soyqırımının 30-cu ildönümü ilə əlaqədar keçirilən rəsm, inşa və intellektual yarışların qaliblərinə sertifikatlar və hədiyyələr təqdim olunub.

Sonda ağacəkmə aksiyası keçirilib.