Bakıda Yaponiyanın Milli Günü – İmperator Əlahəzrət Naruhitonun ad gününə həsr olunmuş rəsmi qəbul keçirilib.

Tədbirdə Yaponiyanın ölkəmizdəki fövqəladə və səlahiyyətli səfiri Vatanabe Katsuya, Azərbaycan XİN rəhbərinin müavini Elnur Məmmədov, Azərbaycanda akkreditə olunmuş diplomatik korpusun nümayəndələri və digər rəsmi şəxslər iştirak edib.

Tədbirin açılışında hər iki ölkənin dövlət himnləri səsləndirilib.

Açılış nitqi ilə çıxış edən Yaponiya səfiri İmperatorun 63-cü doğum günü ilə bağlı keçirilən tədbir iştirakçılarını salamlayaraq bildirib ki, ölkələrimiz arasında möhkəm dostluq əlaqələri hər gün daha da inkişaf edir.

Diplomat ötən ilin yanvar ayında ölkəsində baş vermiş zəlzələ zamanı Azərbaycanın dəstəyinə görə təşəkkür edib:

“İlk öncə, ötən ilin yanvar ayında Yaponiyanın Noto yarımadasında baş vermiş zəlzələdə dünyasını dəyişmiş şəxslərin doğma və yaxınlarına dərin hüznlə başsağlığımı bildirir, zərər çəkmişlərə ürəkdən şəfqət diləyirəm.

Bundan əlavə, fürsətdən istifadə edərək, Azərbaycandakı dostlardan və digər müxtəlif xalqlardan gələn çoxsaylı səmimi dəstək sözlərinə görə də minnətdarlığımı bildirmək istəyirəm.
Bu yaxınlarda baş vermiş fəlakət Bakının Xətai rayonu ilə qardaşlaşmış İşikava prefekturasının Şika şəhərinə də xeyli ziyan vurub. Fəlakətə məruz qalmış ərazilərin və insanların bu təsirdən tez bir zamanda bərpa olunacağına səmimi qəlbdən inanıram və qarşıdakı zamanlarda şəhərlərimiz arasında əlaqələrin davamlı olmasını ürəkdən arzulayıram”.

Vatanabe Katsuya Azərbaycan-Yaponiya dostluğunun tarixi barədə məlumatı diqqətə çatdırıb.
“Azərbaycan və Yaponiya arasındakı ümumi dostluğa nəzər saldıqda aydın olur ki, 1992-ci ildə diplomatik münasibətlərin əsası qoyulmasından indiyə qədər ikitərəfli münasibətlərimizin tarixçəsi bütün sahələrdə, o cümlədən siyasi, iqtisadi, mədəni və təhsil sahələrində inkişafın şahidi olub.

Bu cür fəal əməkdaşlıq və insanlar arasında canlı mübadilələr xalqlarımız arasında möhkəm əlaqələr yaradıb. Şübhəsiz ki, bu əvəzsiz münasibətlərin əsası Prezident İlham Əliyev tərəfindən qoyulub.

Prezident İlham Əliyevi yenidən prezident seçilməsi münasibətilə ürəkdən təbrik edirəm. İlham Əliyevin prezident kimi fəaliyyətinin 20 illiyini qeyd etdiyi bir vaxtda onun yenidən böyük dəstəklə seçilməsi Azərbaycan üçün yeni eranın başlanğıcını göstərir.
Həqiqətən də, bu il Azərbaycanın COP29-a ev sahibliyi etmək qərarı bu yeni eranın başlanğıcı kimi böyük əhəmiyyət kəsb edir və mən, Azərbaycanın dostu olaraq bu qərarı ürəkdən alqışlayıram.

Azərbaycan 2024-cü ili “Yaşıl dünya naminə həmrəylik ili” kimi elan edib. Yaşıl cəmiyyətin yaradılması yaxın illərdə təkcə Azərbaycan üçün deyil, həm də bütün dünya üçün mühüm çağırışdır. Mən Azərbaycanın bu problemlərin həllində, xüsusilə enerji siyasəti kimi sahələrdə qabaqcıl rolunu səbirsizliklə gözləyirəm və ümid edirəm ki, Yaponiya öz təcrübəsindən, texnoloji bilik və bacarıqlarından istifadə edərək, gələcəkdə birlikdə bu çağırışların həllində dəstək ola bilər.

Gələn il Yaponiyanın Osaka şəhərində “EXPO 2025” sərgisinin mövzusu “Həyatımız üçün gələcək cəmiyyəti formalaşdıraq” olacaq. Əminəm ki, bu platforma bəşəriyyətin ümumi problemlərinin həlli, dünyanın kollektiv müdrikliyinin, o cümlədən qabaqcıl texnologiyaların toplanması, yeni ideyaların yaradılması və yayılmasının təşviqi üçün mayak rolunu oynayacaq”, - deyə diplomat əlavə edib.

Tədbirdə çıxış edən Elnur Məmmədov ölkələrimiz arasında birgə əməkdaşlığın ötən illər ərzində daha da genişləndiyini qeyd edib:
“Ötən illər ərzində Azərbaycanla Yaponiya arasında neft sektoru, “İpək yolu” layihəsi, ölkəmizin “Şimal-1” və “Şimal-2” elektrik stansiyalarının tikintisi sahələrindəki birgə əməkdaşlıq uğurla davam etdirilib.

1999-cu ildə yaradılan Azərbaycan-Yaponiya İqtisadi Əməkdaşlıq üzrə Dövlət Komissiyasının bu günə qədər 11 iclası keçirilib və növbəti iclasın Yaponiyada keçirilməsi ilə bağlı müvafiq işlər davam etdirilir.

Ötən il ölkələrimiz arasında ticarət dövriyyəsində 2022-ci illə müqayisədə 49 faiz artımın müşahidə edilməsi və 452 mln. ABŞ dolları təşkil etməsi, qarşıdakı illərdə mövcud potensiala cavab verəcək artımın olacağına ümid yaradır.

Bu mənada “Azərbaycan Respublikası və Yaponiya arasında sərmayələrin təşviqi və qorunması haqqında Saziş” layihəsi müzakirələrinin sona çatdırılması Azərbaycan və Yaponiya arasında sərmayə qoyuluşlarının artırılmasına mühüm töhfə verəcək”.

Məmmədov bildirib ki, hazırda iki ölkənin iqtisadi sahədə əməkdaşlığının daha da yüksəldilməsi üçün işlər davam etdirilir:
“Bu gün iki ölkə arasında qeyri-neft sektoru və xidmətlər sahəsində də ticarət dövriyyəsinin artırılması üçün imkanlar mövcuddur ki, bu da Azərbaycanın sənaye zonalarında istehsal olunan məhsulların Yaponiya bazarına ixracının təşviqi, Yaponiya şirkətlərinin Azərbaycanın sənaye zonalarında investisiya layihələrinə cəlb edilməsi yolu ilə əldə edilə bilər”.

Diplomat işğaldan azad edilmiş ərazilərimizdə görülən yenidənqurma işlərinə toxunub.

“Məlumdur ki, hazırda Azərbaycan işğaldan azad edilmiş torpaqlarda yeni iqtisadi layihələr həyata keçirir, geniş yenidənqurma işləri aparır. Qarabağ və Şərqi Zəngəzur İqtisadi Rayonunda yaranmış nəqliyyat qovşağı sülh və regionlararası ticarət üçün yeni imkanlar açır.
Hazırda Ağdamda yaradılmış Sənaye Parkına, Cəbrayıldakı Araz Vadisi İqtisadi Zonasına maraq getdikcə artır. Ölkəmizin iqtisadi inkişaf kursunda işğaldan azad edilmiş ərazilərdə “Ağıllı şəhər” və “Ağıllı kənd” konsepsiyalarının həyata keçirilməsi, “yaşıl enerji” zonalarının yaradılması əsas istiqamətlərdən biridir.

Qubadlı, Zəngilan, Cəbrayıl və Füzuli rayonlarında günəş enerjisi, Laçın və Kəlbəcərdə külək enerjisi layihələri üçün əlverişli potensial mövcuddur.

Sevindirici haldır ki, tək Qarabağ bölgəsində deyil, hazırda Naxçıvan Muxtar Respublikasında da energetika sahəsində yapon şirkətləri ilə müxtəlif layihələr həyata keçirilir.

Təsadüfi deyil ki, Azərbaycan Prezidenti İlham Əliyevin Sərəncamı ilə 2024-cü il Azərbaycanda “Yaşıl dünya naminə həmrəylik ili” elan edilib. Bu il ölkəmizin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP 29) ev sahibliyi etməsi, ölkəmizin yaşıl iqtisadiyyata keçid strategiyasının davamıdır.

Bərpa olunan enerji sahəsində Yaponiyanın ölkəmizlə əməkdaşlığı daha da inkişaf etdirəcəyinə inanırıq. Ötən illər ərzində hər iki ölkənin parlamentləri arasında müsbət və dinamik əlaqələrin məntiqi davamı olaraq, Yaponiya-Azərbaycan parlamentlərarası Dostluq Liqasının sədri Akira Amari Azərbaycan Respublikası Prezidentinin Sərəncamı ilə 2023-cü ildə Azərbaycan Respublikası ilə Yaponiya arasında dostluq və əməkdaşlıq əlaqələrinin inkişafında xüsusi xidmətlərinə görə “Dostluq” ordeni ilə təltif edilib.

Əməkdaşlığın digər vacib sahələrindən biri də humanitar sahədə inkişaf edən əlaqələrimizdir. Yaponiyanın humanitar təşkilatları ölkəmizdə təhsil, səhiyyə, kənd təsərrüfatı və digər sosial sahələrdə müxtəlif layihələr həyata keçirir. Son illər ikitərəfli münasibətlərimizdə regionlararası əlaqələr də xüsusi yer tutur.
Azərbaycanın İsmayıllı rayonu ilə Yaponiyanın İto şəhəri, Bakı şəhərinin Xətai rayonu ilə Yaponiyanın Şika şəhəri arasında qurulmuş münasibətlər, həmçinin Ağdam və Hiroşima, Qarabağın mədəniyyət beşiyi Şuşa ilə Okayama şəhərləri arasında əməkdaşlıq əlaqələrinin qurulması istiqamətində davam edən fəaliyyət buna misal göstərilə bilər”, - deyə nazir müavini vurğulayıb.

Diplomat nitqinin sonunda ölkələrimiz arasında dostluq münasibətlərinin və birgə fəaliyyətin daha da inkişaf edəcəyinə əminliyini qeyd edib:

“Bu gün ölkələrimiz arasında qarşılıqlı maraqlara əsaslanan əlaqələrin və müxtəlif sahələrdə əməkdaşlığın daha da genişləndirilməsi üçün böyük potensial mövcuddur. İnanıram ki, bu imkanlardan istifadə edərək, Azərbaycan-Yaponiya arasında dostluq münasibətlərinin və birgə fəaliyyətin daha da inkişaf etməsinə nail olacağıq”.