Yeni Zelandiyanın Şimal adasında “Qabriel” tropik siklonunun yaratdığı daşqınlar nəticəsində ölənlərin sayı 11 nəfərə çatıb.

AZƏRTAC xəbər verir ki, bunu Yeni Zelandiya polisi radio efirində (Radio New Zealand National) söyləyib.

Daha əvvəl 9 nəfərin öldüyü bildirilmişdi.

Siklonun əsas zərbə vurduğu Yeni Zelandiyanın Şimal adasının bir sıra rayonlarında vəziyyət çətin olaraq qalır. Bütün orta məktəblər, uşaq bağçaları, ali təhsil müəssisələri bağlıdır. Magistral yolların bir hissəsi sürüşmə nəticəsində dağılıb.

Daşqınlar səbəbindən bəzi ucqar yerlər təchizat xətlərindən ayrı düşüb. Həmin yerlərə ərzaq, içməli su və zəruri mallar ölkənin silahlı qüvvələrinin helikopterləri vasitəsilə çatdırılır.