Venesuelanın devrilmiş lideri Nikolas Maduronun ABŞ tərəfindən tutulması əməliyyatından sonra Mərkəzi Kəşfiyyat İdarəsinin məxfi hesabatı ortaya çıxıb. Hesabatda deyilir ki, Maduro hakimiyyətini itirərsə, Venesuelada keçid hökuməti müxalifət tərəfindən deyil, rejim daxilindəki şəxslər tərəfindən yaradıla bilər. Hesabata görə, Vaşinqton vitse-prezident Delsi Rodrigezi və bəzi yüksək vəzifəli rejim rəsmilərini qısamüddətli sabitliyi təmin etmək üçün potensial keçid aktorları hesab edir.

Musavat.com xəbər verir ki, Wall Street Journal qəzetinin məsələ ilə tanış olan iki mənbəyə istinadən xəbərinə görə, Mərkəzi Kəşfiyyat İdarəsinin (CIA) hesabatında Venesuelanın devrilmiş lideri Nikolas Maduronun tutulması və mühakimə olunmasından sonrakı yol xəritəsi ətraflı şəkildə göstərilib.

Hesabata görə, məxfi sənəddə göstərilir ki, Mərkəzi Kəşfiyyat İdarəsi ölkə administrasiyasında Maduro tərəfdarlarının yüksək vəzifəli şəxslərinin iştirak etməsinin sabitlik üçün daha çox ehtimal olunan ssenari olduğunu qiymətləndirir.

Mənbələr bildiriblər ki, Tramp hesabatla bağlı ətraflı brifinq edib və bu məlumatı milli təhlükəsizlik komandasındakı məhdud sayda yüksək vəzifəli məmurla paylaşıb. Məlumatdan sonra Trampın Rodrigesə dəstək mesajı göndərdiyi və müxalifət lideri Mariya Korina Maçadodan uzaqlaşdığı iddia edilib.

Ağ Evin mətbuat katibi Karolin Levitt isə bu iddiaları təkzib edib:

“Prezident Tramp müntəzəm olaraq dünyanın hər yerində yerli siyasi dinamika barədə məlumatlandırılır. Prezident və onun milli təhlükəsizlik komandası Venesuelanın ABŞ-ın maraqlarına uyğun hərəkət etməsini və Venesuelanı xalq üçün daha yaxşı bir yerə çevirməsini təmin etmək üçün real qərarlar qəbul edir.”