ABŞ Maliyyə Nazirliyi Bosniya və Herseqovinanın Kəşfiyyat və Təhlükəsizlik Xidmətinin sabiq rəhbəri Osman Mehmedagiçi sanksiya siyahısına daxil edib.

AZƏRTAC xəbər verir ki, Osman Mehmedagiçlə yanaşı, Serb Respublikasının Geodeziya və Mülkiyyət Hüququ İdarəsinin direktoru Draqan Stankoviç və mafiya başçısı Edin Qacanin də sanksiya siyahısına salınıb.

O.Mehmedagiçin “BH Telecom” dövlət telekommunikasiya şirkətini Demokratik Fəaliyyət Partiyasının xeyrinə istifadə etdiyi, partiya ilə əlaqəsi olmayan siyasətçilərin mobil telefon məlumatlarını topladığı, cinayət şəbəkələri ilə əməkdaşlıq qurmaqla özünün və siyasi partiyanın nəfinə işlər gördüyü iddia olunur.

Sanksiya tətbiq edilən hər üç nəfərin regional sabitlik, qurumlara inam və Qərbi Balkan regionunda demokratik idarəçilik qurmaq istəyənlər üçün təhlükə yaratdığı bildirilir.