İtaliya Aralıq dənizində üzən humanitar gəmilərdəki 500-dən çox miqrantı qəbul edəcək.

AZƏRTAC xəbər verir ki, İtaliya sahillərinə yan alan “SOS Humanity” qeyri-hökumət təşkilatına məxsus “Humanity 1”gəmisinin göyərtəsindəki 261 miqrant Bari şəhərinə çatdırılacaq. Sərhədsiz Həkimlər Təşkilatına məxsus “Geo Barents” gəmisindəki 248 miqrant isə Salerno şəhərinə gətiriləcək.

İtaliya Baş nazirinin müavini, xarici işlər və beynəlxalq əməkdaşlıq naziri Antonio Tayani deyib ki, qaydalara riayət edildiyi müddətdə ölkəsi miqrantların qəbulunda üzərinə düşəni etməyə hazırdır.

Xatırladaq ki, İtaliya ötən gün Almaniyanın “Louise Michel” qeyri-hökumət təşkilatına məxsus humanitar gəmidəki 33 miqrantı qəbul etmişdi.