İtaliya Aralıq dənizində Almaniyanın “Louise Michel” qeyri-hökumət təşkilatına (QHT) məxsus humanitar gəmidəki 33 miqrantı qəbul edib.

AZƏRTAC xəbər verir ki, Misir vətəndaşı olan miqrantlar İtaliya Sahil Mühafizə Komandanlığının patrul gəmisinin müşayiəti ilə Lampeduza adasına gətirilib.

Lampeduza adasındakı qaçqın düşərgəsində vəziyyət isə mürəkkəb olaraq qalır. Belə ki, 350 yerlik düşərgəyə 1068 miqrant yerləşdirilib.

Hazırda İtaliya sahillərində “SOS Humanity” qeyri-hökumət təşkilatına məxsus “Humanity 1” və Sərhədsiz Həkimlər Təşkilatına məxsus “Geo Barents” gəmilərindəki ümumilikdə 500-dən çox miqrant təhlükəsiz liman gözləyir. Həmin mühacirlər arasında qadınların və valideyn müşayiəti olmayan azyaşlıların da olduğu bildirilib.

İtaliyanın Daxili İşlər Nazirliyinin məlumatına görə, cari ilin yanvar ayından dekabrın əvvəlinədək dəniz yolu ilə İtaliyaya 94,6 mindən çox qanunsuz miqrant gəlib.

Nihad Budaqov

AZƏRTAC-ın xüsusi müxbiri

Roma

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin