Gənclər öz fəaliyyətləri ilə Azərbaycanın dinamik inkişaf edən qüdrətli dövlətə çevrilməsi prosesinə öz töhfələrini verir, sübut edirlər ki, onlar ölkəmizin dəyərli vətəndaşlarıdır.

Bu fikir Qarabağ Regional Gənclər və İdman İdarəsinin Ağcabədi Rayonu üzrə Gənclər və İdman Sektorunun, Ağcabədi Rayon Heydər Əliyev Mərkəzinin, Gənclərin İnkişafı və Karyera Mərkəzinin Ağcabədi rayon nümayəndəliyinin birgə təşkilatçılığı ilə keçirilən 12 Avqust – Beynəlxalq Gənclər Gününə həsr olunmuş tədbirdə səsləndirilib.

Ağcabədi Olimpiya İdman Kompleksində baş tutan tədbirdə Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş həmvətənlərimizin əziz xatirəsi bir dəqiqəlik sükutla yad edilib.

Tədbirdə çıxış edənlər dövlət gənclər siyasətindən, gənclərin ölkəmizin ictimai-siyasi həyatındakı rolundan danışıblar. Bildirilib ki, ölkəmizdə gənclər siyasətinin əsası Ümummilli Lider Heydər Əliyev tərəfindən qoyulub. Ulu Öndər hər zaman gənclərin imkan və bacarıqlarını yüksək qiymətləndirir, onların problemlərinin həlli istiqamətində həyata keçirilən tədbirlərə xüsusi önəm verir, bu siyasəti müstəqil Azərbaycan dövlətinin ən mühüm fəaliyyət istiqamətlərindən biri kimi dəyərləndirirdi. O, gənclərə böyük ümidlər bəsləyir, dəfələrlə qeyd edirdi ki, Azərbaycanın gələcəyi gənclərin əlindədir. Dövlət gənclər siyasəti hazırda dahi rəhbərin layiqli davamçısı Prezident, Müzəffər Ali Baş Komandan İlham Əliyev tərəfindən uğurla davam etdirilir.

Tədbirdə gənclərin fikirləri dinlənilib, onları maraqlandıran suallar cavablandırılıb.

Sonda dövlət gənclər siyasətindən irəli gələn tədbirlərdə göstərdiyi fəallığa görə bir qrup gəncə Qarabağ Regional Gənclər və İdman İdarəsinin fəxri fərmanları təqdim edilib.