Azərbaycanın NATO ilə siyasi dialoqu və praktiki əməkdaşlığı var.

Bunu bu gün ADA Universitetində keçirilən "Davamlı Sabah üçün Qadınlar" mövzusunda yüksək səviyyəli konfransda çıxışı zamanı Azərbaycanın NATO yanındakı Nümayəndəliyinin rəhbəri Cəfər Hüseynzadə deyib.

O qeyd edib ki, bizim Əfqanıstandakı hərbi kontingentimiz alyans ölkələrindən olan sülhməramlılarla birlikdə çalışıb.

“Azərbaycan sülhməramlıları Əfqanıstanı ən son tərk edən ölkələrdən oldu, biz son ana qədər evakuasiya prosesinə dəstək verdik. Bu, NATO Baş katibi və digər rəsmilər tərəfindən qiymətləndirildi. NATO ilə əməkdaşlığımız müxtəlif sahələri əhatə edir. Azərbaycan NATO ilə güclü tərəfdaşlıq qurub, beynəlxalq təhlükəsizliyə töhfə verib”, - deyə o bildirib.