Paytaxtın Xətai prospektində aparılan xətlənmə işləri sürücülərdə çaşqınlıq yaradıb.
Velosiped zolağının solunda yaradılan parklanma yerləri bir çox sürücülərin narazılığına səbəb olub.
Sosial şəbəkələrdə görüntülər paylaşan şəxslər yolun hərəkət hissəsinin hesabına yaradılan parklanma ərazisinin onların hərəkətinə çətinlik yaratdığını deyiblər.
Məsələ ilə bağlı Azərbaycan Yerüstü Nəqliyyat Agentliyindən sorğumuza cavab olaraq bildirildi ki, yeni təşkil edilmiş parklanma yeri normativlərə və qanunvericiliyə uyğundur: “Prospektdə mikromobillik zolağı və avtomobillər üçün parklanma yerləri yanaşı təşkil edilib. Beynəlxalq təcrübədə geniş istifadə olunan bu cür yanaşma mövcud standartlara və qanunvericiliyə də uyğundur. Burada əsas iki məqsədə nail olunur - mikromobillik istifadəçilərinin təhlükəsizliyi və biznes subyektlərinin maraqlarının qorunması.
Oxşar sxemlər paytaxtın Mətbuat prospekti, Nəcəfqulu Rəfiyev, Afiyəddin Cəlilov, Xaqani və Şıxəli Qurbanov küçələrində uğurla tətbiq olunub”.
