Leyden Universitetinin professoru Kornelis van Vollenhoven hələ bir əsrdən də çox əvvəl demişdi ki, Niderland beynəlxalq hüquq nizamını təşviq etmək vəzifəsinə malikdir. Təəssüf ki, Xristian Birliyinin (CU) parlament fraksiyasının hazırkı siyasəti ölkənin bu mənəvi çağırışını dərindən sarsıdır.

AZƏRTAC xəbər verir ki, bu fikirlər Azərbaycanın Niderland Krallığındakı səfirliyinin bu ölkənin Nümayəndələr Palatasında Xristian Birliyi fraksiyasının üzvü Stieneke van der Qraafa ünvanlandığı məktubda yer alıb.

Qeyd edək ki, erməni lobbisinin təsiri altında olan bu deputat “Azərbaycanı Dağlıq Qarabağ xalqına qarşı hərbi əməliyyatları dayandırmağa birgə çağırış” adlı təklifin parlamentdə səsverməyə çıxarılmasını irəli sürüb.

Məktubda Laçın-Şuşa-Xankəndi yolunda Azərbaycanın vətəndaş cəmiyyəti və ekologiya üzrə qeyri-hökumət təşkilatlarının 400-dən çox nümayəndəsinin Rusiya Federasiyasının sülhməramlı kontingentinin müvəqqəti yerləşdirildiyi Azərbaycan ərazisində Ermənistan tərəfindən ölkəmizin təbii sərvətlərinin qanunsuz istismarına və bununla bağlı Qarabağ İqtisadi Zonasında ekoloji vəziyyətin pisləşməsinə qarşı dinc etiraz aksiyası keçirməsinin tam legitim olduğu vurğulanıb. Bildirilib ki, Ermənistanın Azərbaycanın suveren ərazisində həyata keçirdiyi qeyri-qanuni iqtisadi fəaliyyət beynəlxalq konvensiyaların müddəalarını kobud şəkildə pozur və Yerevan buna görə hüquqi məsuliyyət daşıyır.

Qeyd edilib ki, Ermənistan tərəfinin Azərbaycanın Laçın yolunu “bağlamaq”la regionda “qaz təchizatı böhranı və humanitar fəlakət yaratmaq” kimi ittihamları ikiüzlülükdür. Bu yolu azərbaycanlı etirazçılar deyil, Rusiya Federasiyasının sülhməramlı kontingenti bağlayıb və bu, məktuba əlavə edilən fotolardan da aydın görünür.

Azərbaycanın vətəndaş cəmiyyətinin nümayəndələri talan edilmiş təbii sərvətlərin qanunsuz daşınmasının qarşısını almağa çalışır, humanitar məqsədlər üçün Ermənistanın mülki maşınlarının hərəkətinə mane olmurlar. Onlar Rusiya sülhməramlı kontingentə məxsus nəqliyyat vasitələrinin və malların hərəkətinə də müdaxilə etmirlər.

Məktubda bildirilib ki, Azərbaycan öz ərazilərində yaşayan bütün erməni sakinlərin humanitar ehtiyaclarını təmin etməyə hazırdır, ölkəmizin bütün tibb müəssisələri və səhiyyə müəssisələri onların üzünə açıqdır. Ona görə də erməni tərəfinin bu təbliğat xarakterli bəyanatları və iddiaları yalan və əsassızdır.

2020-ci il noyabrın 10-da imzalanmış üçtərəfli Bəyanatla bağlı bildirilib ki, Ermənistan bu sənədin 4-cü bəndini pozaraq öz qanunsuz silahlı birləşmələrini Azərbaycanın Qarabağ bölgəsindən çıxarmaqdan imtina edir. Həmçinin 9-cu bəndi pozaraq regionda bütün nəqliyyat kommunikasiyalarının açılmasına mane olur.

Ermənistan həmin Bəyanatın 6-cı bəndini pozaraq Laçın yolundan hərbi məqsədlər və qeyri-qanuni fəaliyyət üçün sui-istifadə etməkdə davam edir. Ermənistanın 2021-ci ildə istehsal etdiyi minaların Laçın yolu ilə Azərbaycan ərazilərinə daşınması və orada basdırılması Bəyanatın müddəalarının kobud şəkildə pozulmasıdır. Bu, həmçinin 750.000 azərbaycanlı məcburi köçkünün öz doğma evlərinə qayıtmasını çətinləşdirir. Ermənistanın davam edən mina yerləşdirmə siyasəti nəticəsində Vətən müharibəsi başa çatdıqdan sonra 268 Azərbaycan vətəndaşı mina partlayışlarının qurbanı olub. Onlardan 2-si jurnalist olmaqla, 45 nəfər həyatını itirib. Həlak olan 45 nəfərdən 35-i mülki şəxsdir.

“Çox təəssüf ki, sizin parlament fraksiyanız Ermənistan tərəfinin diqqətini 2020-ci il 10 noyabr tarixli Bəyanatın müddəalarına ciddi əməl olunmasının zəruriliyinə cəlb etmək və Azərbaycanla sülh gündəliyi üzərində fəal işləməyə çağırmaq əvəzinə, qeyri-məhsuldar qərəzli hərəkətlərin sistemli qəbulu üçün Ermənistanın qondarma rəvayətlərindən istifadə edir.

Bu fakt, həmçinin Xristian Birliyi fraksiyasını Ermənistan tərəfindən Azərbaycanın Qarabağ bölgəsinin azərbaycanlı əhalisinin hüquqlarının kobud şəkildə pozulmasına göz yummaq, Azərbaycan tərəfi, xüsusən də onun Haaqadakı səfiri ilə dialoqdan çəkinmək mövqeyidir”, - deyə məktubda vurğulanıb. Məktubdan göründüyü kimi, bu deputatın Azərbaycan səfiri ilə görüşdən yayınması onun, əslində, reallığı yaxşı bildiyi ehtimalını yaradır. Niderlandlı deputat reallığı bildiyi və özünün pis vəziyyətə qalacağını bilərək, görüşdən imtina edib. Ancaq bilməlidir ki, heç kim həqiqəti gizlədə bilməz. Vurğulanıb ki, Xristian Birliyi fraksiyasının Niderland Nümayəndələr Palatasına yazılı təklifi bu fraksiyanın Azərbaycanın suverenliyi və ərazi bütövlüyünü hədəfə alan ədalətsiz anti-Azərbaycan kampaniyasının tərkib hissəsidir.